«Ստոմատոլոգիայի և դիմածնոտային վիրաբուժության արդի խնդիրները» խորագրով IV միջազգային վեհաժողովը Երևանում

Երևանում մայիսի 21-24-ը տեղի ունեցավ «Ստոմատոլոգիայի և դիմածնոտային վիրաբուժության արդի խնդիրները» խորագրով IV միջազգային վեհաժողովը: Վեհաժողովի կազմակերպիչներն էին Մ. Հերացու անվան պետական բժշկական համալսարանն ու «Ստոմատոլոգիական կրթություն և գիտություն» ասոցիացիան:

«Ստոմատոլոգիական կրթություն և գիտություն» ասոցիացիայի նախագահ, ՀՀ ԱՆ գլխավոր ստոմատոլոգ Լազար Եսայանը Մեդ Պրակտիկի հետ զրույցում մանրամասներ ներկայացրեց միջոցառման մասին:

– Երկու տարին մեկ անգամ «Ստոմատոլոգիական կրթություն և գիտություն» ասոցիացիան կազմակերպում է իր հերթական միջազգային վեհաժողովը: Յուրաքանչյուր անգամ այն նվիրված է որևէ առիթի: Այս անգամ առիթը ասոցիացիայի հնգամյակն է: Վեհաժողովի գլխավոր թեման էր՝ «Ստոմատոլոգիայի և դիմածնոտային վիրաբուժության արդի խնդիրները»:

– Վեհաժողովին շա՞տ հյուրեր կային արտերկրից:

– Այո, ունենք բազմաթիվ հյուրեր արտասահմանից՝ Ֆրանսիայից, Գերմանիայից, Ամերիկայից, Ճապոնիայից, Լեհաստանից. շատ են, վախենում եմ մոռանալ որևէ մեկին: Բավականին լայն աշխարհագրություն ունենք: Մի շարք կազմակերպություններ առաջին անգամ են մասնակցում վեհաժողովին՝ ներկայացնելով իրենց արտադրանքը: Արտասահմանյան կազմակերպություններից շատերը գործընկերներ են փնտրում Հայաստանում. հնարավոր է՝ լավ համագործակցություններ ստացվեն այս վեհաժողովից հետո:

– Վեհաժողովն արդեն ավանդական է դարձել. սովորաբար որո՞նք են լինում նրա գլխավոր ձեռքբերումները:

– Բնականաբար, յուրաքանչյուր գիտական-պրակտիկ վերաժողով ենթադրում է ոչ միայն դասախոսություններ, այլև գործնական հատված… Վեհաժողովի շրջանակում անց են կացվել ձեռքի հմտության դասընթացներ: Ուսանողները, մասնակցելով դրանց, ավելի են հմտանում իրենց մասնագիտական գործունեության մեջ: Գլխավոր արդյունքներից է նաև արտերկրում գործընկերներ գտնելը: Մենք չենք սահմանափակվում Հայաստանում նման միջոցառումներ կազմակերպելով, ինքներս ևս գնում ենք այլ երկրներ՝ մասնակցելու վեհաժողովների:

Հայաստանի ստոմատոլոգների ասոցիացիայի նախագահ Աշոտ Գևորգյանը մեզ հետ զրույցում մեծապես կարևորեց վեհաժողովի կազմակերպումը, «Ստոմատոլոգիական կրթություն և գիտություն» ասոցիացիայի գործունեությունը:

– Ինչպես շատ երկրներում, վերջին տարիներին Հայաստանում ևս քանակով շատացան նեղ մասնագիտական ասոցիացիաները, սակայն նրանցից քչերն են ակտիվ: Շատ ուրախ ենք, որ «Ստոմատոլոգիական կրթություն և գիտություն» ասոցիացիան նման որակյալ միջոցառումներ է կազմակերպում: Այս վեհաժողովը ևս, կարծում եմ, մեծ ներդրում կունենա Հայաստանի ստոմատոլոգիայի զարգացման գործում:

Գերմանական «Շտադա» ընկերության հայաստանյան ներկայացուցչությունը վեհաժողովին մասնակցում էր ստոմատոլոգիայի ոլորտի համար նախատեսված իր արտադրանքով: Մեդ Պրակտիկին մանրամասներ ներկայացրեց ընկերության բժշկական ներկայացուցիչ Արսեն Միրզոյանը:

– «Շտադան» բավականին հայտնի է Եվրոպայում: Մեր շուկայում ավելի շատ հայտնի են «Նիժֆարմ» և «Հեմոֆարմ» բրենդները, որոնք գտնվում են «Շտադա» ընկերության կազմում և համեմատաբար երկար են եղել Հայաստանում:

– Ի՞նչ էր ներկայացնում «Շտադան» վեհաժողովում:

– Ստոմատոլոգների ասոցիացիայի հետ վաղուց ենք համագործակցում: Ունենք դեղամիջոցներ, որոնք կիրառվում են ստոմատոլոգիայում: Մանկական պրակտիկայում ունենք ատամների ծկթման ժամանակ կիրառվող միջոցներ, որոնք, պարունակում են և՛ ցավազրկող, և՛ հակասեպտիկ նյութեր, ունենք հակամանրէային դեղամիջոցներ, որոնք լայնորեն կիրառվում են տարբեր բժշկական միջամտություններից հետո: Բավական բարձր մակարդակով կազմակերպված վեհաժողով էր, շատ գոհ ենք համատեղ աշխատանքից, և կարծում եմ՝ հետագայում կընդլայնվի մեր համագործակցությունն ասոցիացիայի հետ:

– Արտերկրից եկած հյուրերի հետ հասցրե՞լ եք ծանոթանալ, համագործակցության եզրեր գտնել:

 – Իհարկե, շատ կարևոր է փորձի փոխանակումը տարբեր երկրների հետ: Ես տեսնում եմ, որ յուրաքանչյուր տարի նոր տեխնոլոգիաներ են մտնում ստոմատոլոգիական ոլորտ, և շատ ուրախալի է, որ մեր երկրում դրանք նունպես կիրառություն են գտնում:

– Ի՞նչ նորություններ ունի «Շտադան»:

–  Ի ուրախություն բոլորիս՝ ներկայումս Հայաստանյան բժիշկների դեղորայքային զինանոցը ևս  համալրվեց ամբողջ Եվրոպայում հայտնի և լայնորեն կիրառվող Տրանեկսամ հաբերով և ամպուլաներով: Ամպուլաները կիրառվում են հրատապ և հետվիրահատական չդադարող արյունահոսությունների ժամանակ, բժշկի հսկողության տակ, իսկ հաբերը ունեն ավելի լայն կիրառություն: Հանդիսանալով արյունահոսությունը կանգնեցնող ունիվերսալ միջոց՝ այն կիրառում են ևՙ որպես տեղային միջոց, ևՙ որպես համակարգային՝ ատամի հեռացումից հետո, իմպլանտոլոգիական միջամտություններից հետո, քթից արնահոսությունների դեպքում, արնահոսող ստամոքսի և տասներկումատնյա աղիքի խոցի դեպքում, պրոստատեկտոմիայից հետո, գինեկոլոգիական արնահոսությունների դեպքում, արնահոսող թութքի և այլ դեպքերում:

Առհասարակ, ընկերությունը շատ դինամիկ է զարգանում, հաճախ ենք ունենում նորություններ: Յուրաքանչյուր տարի մեր ընկերությունը հադես է գալիս նորագույն դեղամիջոցների արտադրությամբ:

Մեդ-Պրակտիկը զրուցեց նաև վեհաժողովի՝ արտասահմանից ժամանած հյուրերի հետ:

Նիրաջ Խաննա, Չիկագո, ԱՄՆ

– Իմ նպատակն է վեհաժողովի մասնակիցներին ներկայացնել ոլորտի վերջին ձեռքբերումները: Ես այստեղ եմ կրթական նպատակներով: Առաջին անգամ եմ Հայաստանում, վեհաժողովը կազմակերպված է հրաշալի, սիրեցի ձեր քաղաքը: Պատրաստվում եմ ավելի լավ ճանաչել այն: Ես շատ երկրներում եմ եղել, դասախոսություններ կարդացել, այս տարածաշրջանում Հայաստանն առաջինն է:

«Վերդենտ »ընկերության ներկայացուցիչներ Իզաբելա և Ագաթա

– Մենք եկել ենք Լեհաստանից, ներկայացնում ենք «Վերդենտ » ընկերությունը: Շատ ենք ցանկանում, որ Հայաստանում ավելի լավ ճանաչեին ու կիրառեին մեր ընկերության որակյալ արտադրանքը, համոզված կարող ենք ասել, որ այն որակյալ է: Հուսով ենք գործընկերներ և լավ բարեկամներ գտնել Հայաստանում այս վեհաժողովից հետո:

Հարցեր, պատասխաններ, մեկնաբանություններ